Кэнчээригэ кэрэ кэмнэрим
- 08/02/2023
- 79
- нет
Балаҕан ыйын 26-30 күннэригэр, оскуолаҕа киириэн иннинээҕи саастаах оҕолору иитэр-үөрэтэр тэрилтэ үлэһиттэрин күнүгэр аналлаах, оҕолорго уһуйаан туһунан билиилэрин хаҥатар, уһуйаан үлэһиттэрин үлэлэрин билиһиннэрэр, кинилэргэ истиҥ сыһыаны, үлэлэригэр убаастабылы иитэр сыаллаах-соруктаах “Кэнчээригэ кэрэ кэмнэрим” нэдиэлэ киэҥ хабааннаахтык тэрилиннэ.
Ол курдук, нэдиэлэ саҕаланыаҕыттан уһуйаан спорт залыгар “Мин хоббим” диэн детсад үлэһиттэрин талааннаах тарбахтарынан оҥоһуллубут мал-сал, ону тэҥэ өр сылларга муспут коллекцияларын быыстапката турда. Бу быыстапкаҕа туох-туох суоҕай? Оҕуруонан тиһиллибит киэргэллэр, урукку значоктар, открыткалар, сымнаҕас оонньуурдар…
Оттон иитиллээчилэр уһуйаан үлэһиттэрин үлэлэрин кытта чугастык билистилэр: таҥас сууйар сиргэ, ас күөстүүр дьиэҕэ тахса сырыттылар. Ону тэҥэ уһуйааннарын историятын туһунан слайданы сэргии көрдүлэр. Ол кэннэ “Кэнчээри” уһуйаан бэтэрээн үлэһиттэригэр бэйэлэрин илиилэринэн открытка оҥордулар.
Нэдиэлэ олус сэргэхтик уонна истиҥник түмүктэннэ. Ыҥырыылаах ыалдьыттарбыт – “Кэнчээри” уһуйааҥҥа өр кэмнэргэ үтүө суобастаахтык үлэлээбит бэтэрээн үлэһиттэрбит кэлэн, ииттиллээччилэр көмөлөрүнэн туруоруллубут эҕэрдэ номердары дуоһуйа көрдүлэр. Ол кэннэ “Ахтан-санаан ааһыахха…” диэн төгүрүк остуол тула урукку кэмнэрин истиҥник ахтыстылар. Маны тэҥэ бу күн “Кэнчээри” уһуйаан историятыттан” истиэндэ үөрүүлээхтик арыллан, бэтэрээн үлэһиттэрбитигэр чахчы соһуччу уонна үөрүүлээх түгэнинэн буолла. Ити курдук, ыҥырыылаах ыалдьыттар үөрэн-көтөн, долгуйан тарҕастылар.
Комментарий читателей статьи "Кэнчээригэ кэрэ кэмнэрим"